11. apríl 2006:

Skautahöllin

Lazer-hallamál á hefilinn

 

Skautahöllin á Akureyri hefur fest kaup á Lazer-hallamáli á íshefilinn sem notaður er á svellinu. Lazer-sendir er á austurvegg hallarinnar en nemar og stjórntæki, sem eru á sjálfum heflinum, sjá svo um að stilla hnífinn á heflinum ávallt í rétta hæð og tryggja þannig jafnþykkan ís á öllu svellinu.

Þessi nýju búnaður auðveldar starfsmönnum til muna alla stjórnun á heflinum. Nú þarf einungis að styðja á takka en áður þurfti að snúa sérstakri stöng á heflinum sem á var snúningshjól, sem starfsmenn notuðu til þess að stilla þykkt íssins og oft var tilfinningin látin ráða.

 

Orkusparandi

 Með því að ná svellinu niður í lágmarksþykkt þá sparast mikil orka við að viðhalda svellinu. Viðar Jónsson, starfsmaður skautahallarinnar, segir að allt undir 3 cm sé gróði en allt þar fyrir ofan sé tap í eyðslu á rafmagni. “Við þurfum nú reyndar aðeins að stjórnast í þessu, vegna þess að hellan undir ísnum er ekki alveg nógu slétt og því þarf ísinn að vera aðeins þykkri á nokkrum stöðum. En þessi græja auðveldar starfið til muna og er mjög skemmtileg.”

 

 

Á myndinni má sjá nema og stjórntæki sem eru á sjálfum heflinum. Stjórnborðið sem kom í stað snúningshjólsins er staðsett við stýrið og neminn er efst á stönginni sem er á hliðinni á heflinum. Á innfelldu myndinni sést lazer-sendirinn sem er á austurvegg hallarinnar.