4. október 2005

Elstu menn muna ekki eftir öðru eins

 

Eins og áður hefur komið fram hér á síðunni gengur uppsetning snjóframleiðslukerfis í Hlíðarfjalli ágætlega miðað við aðstæður. Guðmundur Karl Jónsson, forstöðumaður VMÍ og Hlíðarfjalls, segir að jafnvel elstu menn muni ekki eftir jafn miklum snjó í fjallinu eins og var í september síðastliðnum. “Hér er allt hvítt og fallegt, eins og það á auðvitað að vera. Þetta mun samt sem áður ekki aftra okkur frá því að taka kerfið í notkun um miðjan nóvember og opna fjallið í byrjun desember eins og áætlanir gerðu ráð fyrir. Við erum búnir að koma öllu í jörð sem þurfti að leggja og við reiknum með að hægt verði að setja vélbúnað í dælustöðina um miðjan október.” segir Guðmundur.

Septembermánuður var kaldur um allt land. Á Akureyri var meðalhitinn 4,7 stig, sem er 1,6 stigum undir meðallagi, og hefur ekki verið svo kalt í september síðan 1982. Þá mældist meðalhiti á Akureyri 4,6 stig. Samkvæmt fréttum frá Veðurstofunni er afar óvenjulegt að snjó festi á Akureyri í september, en það gerðist einmitt nú. Aðeins hefur snjó fest fimm sinnum áður í september á síðustu fjörutíu árum. Úrkoman á Akureyri mældist 92 mm og er það meira en tvöföld meðalúrkoma. Sólskinsstundir voru 79, en eru 85 í meðalári.

 

 Eins og sést á myndinni, sem tekin var í morgun, er snjór yfir öllu skíðasvæðinu í Hlíðarfjalli. Um miðja mynd má sjá nýju dælustöðina sem steypt var upp við misgóð veðurskilyrði. (Smellið á myndina til að sjá stærri útgáfu af henni.)