18. október 2006:

 

Snjóframleiðsla komin í gang í Hlíðarfjalli

Þessa dagana er verið að búa til snjó efst í hlíðum Hlíðarfjalls en snjóframleiðslan hófst á mánudag og eru fjórar snjóvélar nýttar til þess líkt og í fyrra. Guðmundur Karl Jónsson, forstöðumaður skíðasvæðisins í Hlíðarfjalli, segir að verið sé að nýta það kuldakast sem nú er til framleiðslunnar, en frostið efst í hlíðum fjallsins (í um 8-900 metra hæð), mælist nú vera um fjórar til fimm gráður.

Guðmundur segir að ef til vill verði hægt að opna fyrir æfingar í einni brekku efst í fjallinu eftir helgina ef veður leyfir. Í framhaldinu verði þá hægt að flytja búnaðinn niður fjallið til þess að hefja snjóframleiðslu þar. Guðmundur segir það fara eftir frostinu hversu mikið sé hægt að framleiða snjó á dag, en því meira sem frostið er því betra. Sem dæmi má nefna getur hver snjóbyssa notað á bilinu 100 til 600 lítra af vatni við snjóframleiðsluna. Sé frostið á bilinu 10-12 stig þá notar byssan 600 lítra af vatni. Nú nota byssurnar aðeins um 180 lítra og eru því að vinna á um 30% afköstum.

Guðmundur segir að stefnt sé að því að opna skíðasvæðið ekki síðar en í lok nóvember en það fari auðvitað eftir veðri hve stóran hluta af svæðinu verði hægt að opna.