Fréttir: Fjarkinn formlega vígður

9. febrúar 2002:
Í dag, 9. febrúar 2002, var nýja stólalyftan í Hlíðarfjalli formlega vígð að viðstöddum mörgum góðum gestum, m.a. Birni Bjarnasyni, menntamálaráðherra. Lyftunni var við þetta tækifæri gefið nafnið Fjarkinn en efnt var til samkeppni um nafn á þetta glæsilega mannvirki.
Fjarkinn er langfullkomnasta og um leið afkastamesta lyfta hér á landi. Hver stóll er með fjórum sætum og getur lyftan flutt um 2.000 manns á klukkustund.Til samanburðar flutti gamla stólalyftan í Hlíðarfjalli um 450 manns á klukkustund. Sú var orðin 35 ára gömul en hún var á sínum tíma fyrsta stólalyfta landsins. Fullyrða má að með tilkomu nýju lyftunnar er ekki stigið minna skref en þegar gamla lyftan var tekin í gagnið, slík er breytingin. „Lyftan mun hafa gríðarlega mikið að segja þegar til framtíðar er litið og mun hjálpa til við að tryggja Hlíðarfjalli forystuhlutverk meðal skíðasvæða hérlendis. Þessi framkvæmd styrkir Akureyri sem ferðamannastað yfir vetrartímann og eykur aðsókn í fjallið,“ segir Guðmundur Karl Jónsson, forstöðumaður Skíðastaða og framkvæmdastjóri VMÍ.
    Lyftan er frá Doppelmayr, líkt og gamla stólalyftan og raunar aðrar lyftur í fjallinu. Hefur reynsla af þeim verið einstaklega góð. Framkvæmdir við uppsetningu lyftunnar gengu gríðarvel. Byrjað var á að taka gömlu lyftuna niður, jafnt stóla sem möstur og vinna við undirstöður nýju lyftunnar hófst síðla sumars. Síðasta mastur var reist í lok október og þann 20. desember afhenti framleiðandinn Akureyrarbæ lyftuna. Snjórinn lét síðan aðeins bíða eftir sér og því var beðið með formlega vígslu þar til nú. Meðfylgjandi myndir voru teknar við vígslu Fjarkans í dag.

Smellið á myndirnar til að sjá þær stærri.

Tómas Ingi Olrich, stjórnarmaður í VMÍ og Þórarinn B. Jónsson, formaður íþrótta- og tómstundaráðs Akureyrar, standa hér fremstir í hópi gesta við vígsluna. Lengst til hægri er Jóhann G. Sigurðsson, formaður stjórnar VMÍ.	Björn Bjarnason, menntamálaráðherra, flytur ávarp.
Óðinn Árnason, skíðafrömuður og Kristján Þór Júlíusson, bæjarstjóri standa hér fremstir og lengst til hægri er Þröstur Guðjónsson, formaður Íþróttabandalags Akureyrar.	Egill T. Jóhannsssn, formaður Skíðasambands Íslands, afhendir Guðmundi Karli Jónssyni, forstöðumanni Skíðastaða og framkvæmdastjóra VMÍ, skjöld frá Skíðasambandinu.
Margir góðir gestir voru við vígsluna.	Guðmundur Karl Jónsson og Björn Bjarnason, menntamálaráðherra.
Tómas Ingi Olrich, Kristján Þór Júlíusson og Þórarinn B. Jónsson stinga saman nefjum.	Kristján Þór Júlíusson, bæjarstjóri, flytur ávarp.
Benedikt Geirsson flutti kveðju frá Íþrótta- og ólympíusambandi Íslands og afhenti áritaðann skjöld.	Kritján Þór Júlíusson býr sig undir að klippa á borðann með til þess gerðum skærum sem búin voru til úr tveimur skíðum.
Hermann Sigtryggsson og Óðinn Árnason aðstoðuðu bæjarstjóra við borðaklippinguna.	Nú er eins gott að vanda sig.
Og í sundur fór hann.	Óðinn Árnason, Björn Bjarnason, Kristján Þór Júlíusson og Hermann Sigtryggsson fóru fyrstu ferðina. Lengst til vinstri sér Guðmundur Karl Jónsson, forstöðumaður Skíðastaða, til þess að allt fari vel fram.
Hér eru þeir félagar lagðir af stað.	Margir biðu spenntir eftir að prófa lyftuna en frítt var í fjallið fram yfir hádegi í tilefni dagsins.
Beðið eftir stólnum.	Kampakátur forstöðumaður.
Lyftann skilaði mönnum fljótt og örugglega upp að Strýtu. Hér er Jóhann G. Sigurðsson, formaður stjórnar VMÍ, fyrir miðri mynd og honum á vinstri hönd Ívar Sigmundsson, fyrrverandi forstöðumaður Skíðastaða.	Málin rædd við Strýtu.

[ Til baka ]